Сустрэча з пісьменнікам Валерыям Квілорыя адбылася ў ДУА "Сярэдняя школа №1 г. Івацэвічы ім. В.Гука"

Сёння ў актавай зале школы сабраліся самыя юныя чытачы, тыя, хто толькі адкрывае для сябе вялізны свет літаратуры - навучэнцы 1-4 класаў.

Валерый Квілорыя - дзіцячы пісьменнік, лаўрэат і дыпламант розных літаратурных конкурсаў.

Ужо з першых хвілін свайго выступлення аўтар завалодаў увагай хлопцаў. Не перагружаючы дзяцей фактамі з біяграфіі, ён адразу ж перайшоў да апавядання вясёлых гісторый, яны ў яго на любы густ. Займальна, цікава, з гумарам ён знаёміў хлопцаў з кожнай кнігай. Дарэчы, выдадзена іх ужо больш за 40.

Кожнае апавяданне не толькі ўзнімала настрой, але і несла выхаваўчы элемент, прымушаючы задумацца і даведацца пра нешта новае, незвычайнае.

Падчас сустрэчы школьнікі нават паспрабавалі сябе ў ролі інтэрв'юераў і задалі аўтару мноства пытанняў: колькі кніг ён напісаў, якая з іх першая, колькі часу ідзе на працу над кнігай, чаму піша для дзяцей і многія іншыя.

Напрыканцы сустрэчы кожны ахвочы мог набыць кнігі з аўтографам аўтара. Задаволеныя яны марылі хутчэй вярнуцца дадому, каб з першых старонак пагрузіцца ў дзівосны свет Валерыя Квілорыя.